Sistemi arsimor i Kosovës është në grevë të përgjithshme. Studentët e Universitetit të Prishtinës “Hasan Prishtina” thonë se greva po i pengon ata në studimet e tyre.

Ata thonë se tashmë e kanë afatin e provimeve të janarit dhe se greva e punëtorëve të arsimit shkon në dëm të tyre.

Studentja Krenare Buzhala, thotë se kjo grevë po i pengon shumë.

“Greva personalisht po na pengon shumë, sepse ligjërata kemi pasur dhe ato nuk i kemi mbajtur shkaku i grevës. Me provime nuk kemi filluar akoma, por po na pengon se jemi duke e humbur kohën”, thotë studentja Buzhala, për rubrikën e përjavshme VOX të Radio Evropa e Lirë,.

Rinor Gjergji, student, thotë se studentët janë të prekur nga kjo grevë.

“Ne si studentë jemi palë e prekur nga kjo grevë dhe shpresojmë që sa më shpejtë të arrihet një marrëveshje në mes të qeverisë dhe mësimdhënësve në mënyrë që assesi procesi mësimor të mos ndërpritet, sepse kjo gjë po shkakton një pakënaqësi të madhe te studentët. Unë personalisht jam i pakënaqur për ndërprerje të procesit mësimor”, thotë studenti Gjergji.

Ndërsa, studenti Flamur Kabashi, thotë se nuk duhet të ketë shtyrje të afatit të janarit.

“Kam informacione se do të shtyhet afati i provimeve. Unë jam i mendimit që të mos ketë shtyrje të afatit, sepse ka studentë që janë përgatitur për afatin e janarit dhe mendoj që shkon në dëm të studentëve e sidomos profesorët nuk ia vlen të hyjnë në grevë”, thotë studenti Kabashi.

Që nga 14 janari, në grevë janë futur edhe institucionet parashkollore, si niveli i ulët dhe i mesëm i arsimit. Kërkesë kryesore e mësimdhënësve është rritja e pagave.